Tula: Ang Hibik ni Rizal

Ang nobelang Fili ay inialay

Sa tatlong paring nagbuwis ng buhay

Gomburza ang siyang ngalang taglay,

Sa Bagumbayan nga binaril, pinatay!

El Filibusterismo ang nagpaningas

Sa apoy ng poot nitong mga armas,

Ang pananahimik ay siyang winakas

Upang makibaka ng tunay at wagas.

Ito ri’y nagsilbing tagapaghawan,

Sa mga damong munti nitong himagsikan,

Manapa’y nagdulot ng kapighatian

Sa isip ng mga ganid na dayuhan!

Ginamit ni Rizal na tinta ay dugo

Pawis ang kapalit ng lalayang ginto,

At buhay din niya ang siyang sakripisyo,

Upang makalipad, lahing Filipino!

#author #literature